الحلقة السادسة والتسعون من يوميات علوب

يوميات علوب ...96.....كاس الخليج

مشيت الليلة مع (مشاعر ) قالت دايرا تسجل (ماستر ) في كلية ( الهناي) الجامعية دي ..!! (مرات البنات ديل اول مايحسو انو العرس أتأخر شويه ...بعرسو (الماستر ) ده علي بال ماداك يجي) 

وانا طبعا قاطرا ليك ...!!! وهي المجرمة دايراني اشوف موضوع الرسوم ..!!! و انا بيني وبينكم قلتا فرصة نشوف الأجيال الجديده دي وضعها شنو ...!!! مشيت لَقِيتُ ليك البنات ديل كيمان كيمان ....!! شي شهادة سودانية ..!!! وشي شهادة عربية.... وكوم شهادة لندن ...وانا بس اها .... الشهادة ...والعمل الطيب ...!!! اشيل واتفرج وأمتع نفسي بالدهشة ....!! يازووول ماشات وحدانا (وزرافات ...) (زرافات يعني مجموعات ماتفهمونا غلط) ....اها وتركيز شديد عالي التدقيق في الموبايلات ...!!! غايتو كان بركزوا قدر ده في المحاضرات ...( نوبل ) دي ماظنيتا بتجلي مننا السنة دي ...

‎اهامشاعر (الدسيسه ) دي لكزتني بالجنبه كدا قالت لي شوف ديل بنات الشهادة العربية ....!!! 

‎ابو الزفت ....بنات ام لعاب بس ...!!! اول حاجه جات الكتيبة السعوديه ...!!! عرفتهن من العبايات ...ونضارات الشمس قدر الصحن ...

لكن الحلا ظااهره ....والخصل مارقه بالجنبه ...!! ( كاسر الامواج )...سعودي وافتخر ...!! 

يازووول الليله غايتو مولد ... اول يوم مشاعر تعمل فيني حسنه جابتني هنا ...بنات يردن الروح ...!!! نضافه جد ....!! 

ويستمر العرض وطابور الشرف ....وقال كده نزل فريق الدوحه....والنَّاس السمحة ....الله لينا من ( قطر ) 

( والقطر الشالك انتا يتكسر حته حته ... ) وارد قطر ...!!! جنس سماحه هي لكن ....!!!

ده كلو من التكييف المركزي ده ...!! بفتح الروح ضلفتين ...!!! والوش تلاته ضلف ...!!! ☺️الدوحه ...والنفوس منشرحة ....الليله غايتو يمرقنا الله من مجلس التعاون الخليجي ده ...!! 

كمان الشهاده العربية دي لما (تمتزج ) (وتنصهر ) مع الكادر الوطني في (بوتقة ) واحده بعملو جنس شغل ...!!! (والله ماكرهتا كلمة في حياتي ذي (بوتقة ) الحاشرنها في اي حته دي ....) لحدي مااتبوتقنا بوتيق ...!!! نرجع للانصهار ...!! لما جماعة العربية ديل يبدو يتعلمو المصطلحات السودانية ...!! اول مايجن ...شابكاتننا ليك العربية سياره ....!!! والموبايل جوال ....والعيش (خبز) ...!!! ستة يوم بس ... ..ياكلن (البوش) ويقشن ( الحوش ) حلااااتن 

اها بس في قعدتي دي وقالت كدي الاماراتية نزلت ...!!!وججججع ( تجي ولا نجي بطريق ابوظبي ...) الامارات والدعم السريع ....!!! طيارات بس ...!!جن ملوناتن ليك الشعر ده كيف مع الطرحة ....!!! والموبايلات (جلاكسي ) (حصري) ...(دبي دي مافيها (اي فون ) ولا شنو ...!! ) اها ديل طبعا شايفات روحن شديد ...(ودبي بلدنا ...نرفع نعلي شانا) ...!!! تحلف تقول ادوهن الجواز ...الونسه كلها .....ياحليل المولات والبراندات الأصلية 

...وزبادي (اكتفيا )احلي من كابو ...والإمارات أرخص ...وليه ماعندكم مترو ...(ياربي ده مترو كم ...) 

اها ديل السوريين مخصوص فتحو ليهن مطاعم البيتزا ...بحبوها شديد ...!!! ياحليلن ....!!! الله يخلي ( دادي ) والدراهم البي غادي.... 

غايتو الليلة متعة ...!!مع الاحمر والبيجي ...!!! البنات بناتنا والمواصفات خليجي ...!! 

اها بتاعات لندن ديك اصلهن ولا جن حايمات بي هنا بس يورجغن مع بعض ...إنجليزي الجن والجنبو ...(لكن بعرفن عربي الغتيتات) ...بس رافعاتنو في الرف ..!! لي وقت الضيق ...!!! عاجبن الاستايل ..و some one like you 

لكن والله كان سمعتن نصيحتي ...اخير ليكن تندمجن مع الأمة دي ..(والامة مجتمعة) ...!!! ياها الدايمه ...بالطريقة دي لا حتلمو في (بينوسيه ) ولا ( نجاة غرزه) ....!!!! 

واخييرا ...!! الجاز وصل ..اووووووو ....ظهرن بناتنا...!! وبسدو فرقاتنا ...!!! حلات الدنيا عليهن ...صحي في شوية غبار من المواصلات والرقشات ...!!! لكن ...سماحة جد ...!! وفايتا الحد ...والروح عاليه 

وفي شوية ثقة كدا ...!!! (ماكمان لاعبات في ارضن وبين جمهورن .....!! ) وقدله يامولاي حافي حالق ...!!! 

وحلوه جميله وزيك وين يابت بلدي ...!!!! 

مهما مشيتي بتملي العين ...يابت النيل ...وأصلك سوداني ... تتباركي ياشوشو الليله لففتينا الخليج والدول المجاوره ..سوداني وافتخر .....