يوميات علوب ...139 ........الحديقة ( الدورية )
فطوم ( نوارة البيت) قالت إلا يودوها الحديقة الدولية ماعرفتا ذاتي الجاب ليها خبر الحديقة دا منو ....!! وطبعا فطوم دي وكت تطلب حاجه صعب كدا نرد ليها طلبا ....!! قلتا ليها إنتي يافطوم الكلمك بالحديقة الدولية دي منو ....!!؟؟ قالت ديل ناس الكجم ...( والله قلبي كان حاسي ...!! ) ...!! ولا قيتيهم وين ناس ( السجم ) ديل ....!!؟
مشاعر بتكوي ليها في هدوم كدا جنبي الكلام طاقش أضانا ...!! قالت لي هو الكجم الليلة فاتنا ...!! حاتل معانا رسمي ...!! قاعد هنا الْيَوْمَ دا كلو مشي قبل شوية ....جايب معاهو ( عبودي ) ود ( إقبال ) ...!! بقي يعزم كمان
بكلم في ( فطوم ( قال ليها خلي علوب يودينا الحديقة .....!! وقعد بشرح ليها إنو في شنو هناك يشيل ويوصف ليها نص ساعة ....والمجرم بحكي ليها عن حاجات بتحبها ...!!قال ليها اسم واحد كدا في أفلام الكرتون دي ماعرفتو دا منو...!! قال ليها دا طوااالي بكون قاعد هناك ...!! وهي تتمطق ....!!!
بس ضحكتني فطوم ياعلوب قالت ليهو وإنتا مشيت هناك ....!!؟؟ قال ليها لا ...!! وراني ( منذر ) ....!! ( منذر ) دا ود خالتو مرطبين كدا ساكنين في ( المعمورة) ...هو البجيب ليهم اخبار النصف الاخر من الكرة الارضيّة .....!! مرات بجي طابق معاهو البليستيشن 4 حقتو ....!! وحاسي بالعظمة يتجدع ليك فيهم ....!!
بلمو فيهو ناس الكجم ديل معاهو ( شفاتا ) تانين كدا بطقطقو ليك فيها ذي الماحصلت حاجه ....حافظين ( الفرق ) اكتر منو ...!!!
ليحطم الكجم نظرية فاقد الشيء لايعطيه ...بديهم 0/6 ....!!! إنه الإستعداد الفطري والموهبة الربانية ....!!! تماما كما الدول النامية ........عقول بلا إمكانات ...
مشاعر قالت لي مايفوتك ياعلوب هو طبعابقول الحديقة ( الدورية ...) بدل ( الدولية ) ....أها من الوكت داك فطوم ماسكا فيها ...!!
قلتا ليها أفرض ودينا ( فطوم ) ....!! هو دخلو شنو في الموضوع ....!!! مشاعر قالت لي كيف ياخ ...هو صاحب المبادرة ....لازم يكون في الوفد المرافق ....
قلتا ليها خلاص أنا يوم الخميس حاسوقم كلهم ...!! فطوم وعبودي ...والكجم دا ذاتو ..يكجم رقبتو دي ....
قالت لي غايتو كان سمع الخبر دا بموت ....!! المهم أظنو كلموهو ....!! تاني يوم جانا طاير ...يجرجر في بنطلونو ....إتحاوم جنبي كدااا ...في النهاية غلبو ...قال لي علوب ....علوب صحي قالو مودينا الحديقة ( الدورية ...) كتمتا الضحكة بي الدورية دي ...!! قلتا ليهو أيوا ......!! والله يا اخوانا أخد ليهو سرحة كدا....أدفع نص عمري واعرف الزول دا سرح في شنو ....
رجع لي تاني قال لي ...!! اها حنمشي متين ...!!؟. قلتا. لي بعد بكرا ......نطا فووووق واستعدل الشارع وفكا ( البيرك )
طبعا خلاص حيكون صاحي كدا لحدي بعد بكرا ...!!
بيد أني أجزم أن ما رايته من فرح في عيون الصبي جعلني أحلق عاليا ....!!! ما أحلي أن تسعد طفل ......!!!
( حتي ولو كان (الكجم ) ....
يازووول يوم الخميس دا ....فطوم والكجم وعبودي وبنونه ...
...!! ( بنونة ) دي حفيدة فوزية جارتنا ...بت بتها ...وفرزدق صاحب الكجم ...ومنذر ودخالتو ( قالو اهلو حيجيبو هناك يقابل الوفد دا في مدخل الحديقة.... ).....واتنين تانين كدا ماعرفتهم المهم الجيش دا كلو إتلملم ...لغزو الحديقة ( الدورية ) ...!!!
أنا الورطني الليلة شنو مع الشفع ديل ....!! ومالم كتار كدا ...!!
غايتو أقنعنا أنور نسوقم بي عربيتو ...قلتا ليهو مره في السنة ياخ ...!!! بعد تعب اقتنع ....!! و اكتملت الاستعدادات فطوم بي فستان العيد وضنب الحصان من العصر ...ومشاعر تجهز فيها ملبسنها الحلق والسلسل والحال ....دايرا تطير عديييل من الفرح ....!! والكجم بالبنطلون الكحلي والفنلة ....مستحمي الليلة ....!! والجيب دا منفوخ خاتي فيهو حاجه كدا ذي الدومة ...!!! الله يستر ماتكون ( قنبلة ...) وناس عبودي الشعور دي مجلطة كيف ......!! والاندهاشة .....!! والود المعاهم دا كمان بي جزمة الموسيقي البتنور ديك ....!!! فجخك ...!! فجخك ...عذبنا عذاب ...!!
المهم خميناهم كلهم وتيممنا الحديقة الدولية .... أول ما وصلنا هناك قلتا ليهم تمسكو يدين يعض ...ما داير أي فوضي وجوطة ...!! وإلا... والله العظيم طوالي ارجعكم ....!! قالو ثمح ....!!!
اها دخلنا كدا وشافو ليك الألعاب والشفع مالين الواطا والقيامه
قايمة والأنوار .....!! اضنينم دي وقفت ...!!
أنا حسّيت بالكجم والفرزدق ديل ماحيستمرو معانا كتير وحيعلنو انشقاقم في أقرب فرصة ...!! لأنو ( الكجم ) يشيل ويبلع في ريقو ذي الحرامي ...ويلتفت ...!! داير يجوط وينطلق ...زولي وبعرفو ....
أنا وأنور محاوشنهم ذي القطيع ....!!!
ياحليلن البنات وديعااات ...!! ركبناهم ( المرجيحة ) دايرات يطيرن من الفرحة...وكان لي ( وفطوم ) دي فضل ليها تزغرد ...!!!
ووقع المحظور ....!!
إتلفتا كدا لا الكجم ولا فرزدق ولا الود المعاهم....!! التلاته دخلو الغابة .....!!! وساقو ( منذر ) معاهم برضو ...!!!
أنا داير اقعد في الواطا دي ....!! الأولاد ديل أمانة ...هسا نعمل شنو ونتصرف كيف ..!!! جريت يمين شمال مافي أي أثر ...!!! ذاعوهم في الإذاعة الداخلية ( خمسطاشر ) مره التقول أوائل الشهادة ....!! ولا كأنو هم هنا ...!!! ياربي مشو وين ( المرض ) ديل .....!!
ان شاءالله بس بعد دا كلو ....ما يفكرو يطلعو برا ...!!! دا كلو هين ...في النهاية مسكنا البنات ديل لي أسرة كدا ... وانطلقنا
للتفتيش عن العصابة الطاشا دي ...مافي أي أثر ...!! بديت اقلق وحلفتا الليلة يالكجم الأُسَوي فيك ...تعرفو براك ....بس ألم فيك ،...!!! الأولاد ديل يبدو انهم ...عبرو الحدود واتخارجو ....بس مايكونو انضمو لي ( داعش )....!!
أها والعمل ....!!؟؟؟ أنور قال لي نبلغ البوليس .....بوليس شنو
ياخ قلتا لي ديل البسرقم منو هو ذاتو ....!!
قلتا ليهو كدي نمشي المطاعم البرا دي ....فعلا طلعنا ....لافين من مطعم لي مطعم ذي بتاعين المحلية ...!!!
بس أشوف ليك من بعييد ...( الدومة ) المابتغباني ...(الكجم ) أب رويس محكر في نص طربيزة كدا ومعاهو الأولاد ديل ...!! لا ....ووين ...!!؟؟ في ( اولاد ام درمان ...) ....!!
وطالبين شية ....!! 
😳
😳
عليكم الله هسه دي ولدا دي ....!! لما شافني داير يقوم جاري
لكن خجل ....!! خاصة إنو قاعد في مكان محترم ....!! وطبعا الشفع المعاهو ديل بكونو شايفنو ( الكاردينال ) ....!!
أنا ذاتي ما حبيت أحرجو .....!!! قلتا ليهو بس كان تكلمني...!!؟؟ قال لا لا أنا قلتا نتعشي ونجي سرعة ....!!
قلتا ليهو ايواااا.... والعشا (شية ) ...!!!! في أطفال بياكلو ( شية ) يالكجم ...!! يعني لو كبرتو حبه حتاكلو تمساح ...!! بعدين ( الشية ) دي جبتو قروشا من وين ..؟؟
اتاري الكجم عازم ( منذر ) ود خالتو لهذا الغرض ....
قال ( منذر ) دا قال ليهم بابا كلو خميس بجيبن هنا ....!!!
أربكتني العبارة وهزتني من الداخل ....!! وقلت في نفسي ...( منذر ) ...!! أسبوعيا في هذا المكان والكجم يمني نفسه بالزيارة مره في العام .... ...!!! ومستكترنها عليهو ...!!!
حنني شديد ( كجمنتو ) ....!! قلتا ليهم خلاص الليلة تطلبو ما شئتم من الطيبات ..!! دايركم تاكلو المحل دا كلو ...انتشرو ...!! الكجم عايز يغمر ...!!! فعلا جابو ليهم الأكل أشكال وأنواع ومع المشاريب والتحلية والايسكريم ..... وعاثو فسادا .....
الكجم جاني كلمني في أضاني براااحة كدا ..!! قال لي علوب ممكن أشيل حبه من الأكل دا لي (عرفة ) أمي ....!! ( خنقتني العبرة وقتها ...) ..!!! ما أجملك يا كجم ...!! وما أجمل أمك ( عرفة ) ....!!!
..لما مرينا عليهم عشان نسوقو لقيتا بتلبس فيهو وفرحانة أكتر منو إنهم ماشين الحديقة ....وأدتو قروش... قالت ليهو لو عجبتك لعبة العب ...!!! قلتا ليه عيب يا( عرفة ) يعني أنا حاخليهو يدفع ....!! قالت لي العفو ياعلوب والله عارفاك مابتقصر ....أنا بس عايزاهو ما يحس إنو ماعندو ....وقلتا ما احرمو طالما وصل هناك ...إنه قلبها الشفيف وحبها الأخضر الوريف ....!! أوا هناك أعظم ....!!
وقد رد الكجم الجميل ...!! حبا بحب ...!! ووعدا بوعد....!! والبادي أجمل ......
❣️
❣️
قد يتفوق ابن خالته ( منذر ) ببعض من مال ...لكنه من الصعب والمستحيل أن يرتقي عليه بفيض من حب ... أم ( منذر ) تري إبنها جميلا ....!!! وعرفة لديها ( الكجم ) أحلي و أنضر ...وفِي ذلك فليتنافس المتنافسون ....!!!
إنها المشاعر الانسانية الباذخة في أبهي صورها وتجلياتها ....
لقد نسيت وتجاوزت كل مافعله ( الكجم ) الليلة وغفرت له هذا الخروج عن الشرعية والتمرد علي الدولة ....!!!
مش كدا وبس ....!! رجعناهم الحديقة تاني بعد أن تناولوا وجبة العشاء الدسمة ومزيد من اللعب و الألعاب ...لما قالو بس ...!! كان كل همي في تلك اللحظة أن ينتشي هؤلاء الأطفال و أن لايشعرو بحرمان وأنهم اقل من الآخرين ....!!
أسوأ ما قد يمس طفل الشعور بأنه غير قادر علي فعل شيء
يستمتع به أقرانه ....!! سيرافقه هذا الشعور وسيكون دوما لديه الإحساس بالحرمان .....والمحروم لن يكون قادرًا علي سد النقص ولو بعد حين ... اللهم لاتجعل فينا سائلا ولا ( محروم ) ....
عدنا أدراجنا بعد ليلة استثنائية ....سعد فيها هولاء الصغار أيما سعادة .....!! وحلقوا في عوالم الجمال وتملكهم الإحساس انهم مثل غيرهم شركاء في الفرح ...!! ....
لما ركبنا العربية حسو انو وصلو سرايرم وبدأو الهبوط التدريجي نحو النوم ...ماقادرين يفتحو من التعب والحمد لله بتاع جزمة الموسيقي داك نام وتوقف العزف المنفرد ...
عدا الكجم وعبودي لا يريدان التفريط في لحظة كهذه حتي لو بالنظر من خلف الزجاج ومن داخل عربة
نزلناهم واحد واحد في بيوتم ....!! دايرين يتشقو من الفرحة
لاشك إنهم الْيَوْمَ سيحلمون بعالم جميل ....(ولا استثني الكجم ....!! ) ..،.
نزلناهو قدام البيت ....( عرفة ) أمو جات فتحت ليهو ....قبل ما يدخل جاني راجع تاني همس لي كدا قال لي عليك الله ماتكلما إنو مشينا نتعشي بره الحديقة ....!! حلفتك ياعلوب ....ضحكتا وقلتا ليهو حاااااضر يا كجم ...بعدين ياخ دا كلام رجال بينا مع بعض ... قلتا اديهو وضعو الليلة ... أها في حاجة تاني ...قال لي ....حتسوقنا تاني متين ....!!؟؟؟ 😳 دا هسا زول يدوهو وضعو .....!!! ضحكت حد النشوة .....!!
😳 دا هسا زول يدوهو وضعو .....!!! ضحكت حد النشوة .....!!
ونزلت أحمل ( فطوم ) علي كتفي وقد راحت في سبات عميق ممسكا بفردة حذائها في يدي اليسري واحملها هي بالآخري ..وقد احاطت رقبتي بذراعيها الصغيرتين إحاطة السوار بالمعصم .....ولاشك انها تحلم الان بالحديقة
.الله يقدرني واسوقكم تاني ..وتالت ...شكرًا لكم أيها الأنقياء فقد منحتموني الْيَوْمَ الفرح والضياء .... 