يوميات علوب ...87....بي (دستوركم ) يالامريكان
المرا مما تبدا تتكلم براها ... وتشغل المنشات ...!! اعرف طوالي انو الموضوع فيهو راجل ..!! يا اما موجود....!! او لِسَّه ماجا ...!! وفي الحالتين انا الضايع ...!! قبيل مشيت الفرن الجنبنا ده اشتري لي عيش ...!! لقيت ليك أمونه جارتنا دي ...!! امونه الشيطونه ياخ بتعرفوها ....!! اها لقيتا تقلب ليك في العيش ده يمين شمال ...!!وتكلم في روحا ...وانا واقف وهي ماشايفاني ...!!! مسكّت ليها رغيفه تقلب فيها قالت ...بري ..!! بري يالرجال كلكم ذي الرغيف ده تتشابهو ...!!وكل يوم ماشين ناقصين ...الله لاجاب باقيكم ..!! لكن بس ترانا مجبورين ذي الرغيف ده ماببقي من غيرو الاكل ...( هيااا المجبورين ...!! البسمع يقول الرجال واقفين بالصف ) ...اها جدعتا مسكت ليها رغيفه تانيه أدتا قلبا كده بالجنبه ...ورمتا محلها ودورت ..!! سجم خشمي ودي مالا محروقه ...!! حريقة تحرقكم يالرجال ...( ابو الزفت اللليله قايم عليها الكحلي ...!! ) امونه دي كان شافتني حضرتا الكلام ده وسمعتو ممكن عااادي تفلقني ...!!! عملتا نفسي ماسمعتها ولا شفتها ذاتو ...!! لكن هي بتخليني ..أتلفتت ليك علي ..!! هياااا علوب ومالك يااخوي إنسليت كده كملتا من لحم الدنيا ...بتحب ولا شنو ...!!؟ (صراحة غازتني) ...!! قلتا ارجما ليك الحاقده دي ...!! قلتا ليها صدقي يا امونه اول مره تقولي حاجه صاح ....فعلا حب شديد اليومين ديل .....!!! طوالي طقشتني ليك ...!!! ودي منو ( المغبيه) البتحبك دي...قلتا ليها وشها مدور ذي الرغيفه الكنتي بتكلمي فيها دي ...!! ( اصلها باظت خليها تبوظ )
عاينت كدااا ...قالت لي والله ياعلوب تلحق لمن تكلم زول الا انجضك ذي الرغيف ده ...!! قلتا ليها وهو محتاج ياامونه ...!! الحلة دي كلها
عارفا موقفك من الرجال ...!! وبي أمانة موقفك مشرف وقوي وثابت ..!! بس بالله يا امونه الليله طالما اتلاقينا كده من غير ميعاد ..!! ممكن توريني انت ليه زهجانه من الرجال قدر ده مع انك يعني ( عفوا ) ما اتزوجتي وكده ...!! قالت لي كان كلمتك بتحفظ السر عامل عيونك المنططات ديل ( هسه في داعي ) قلتا ليها افووو ....!! طبعا ياامونه ياخ ...!! قالت لي بس هي كلمتك الاخيره دي ...قصة مااتزوجتي دي ...!! وانا وحاتك العرس ماكايسا ولا حاريا ...!! بس كنتا دايرا أعرس كيتا في فوزية وسنية ديل حلفن قالن امونة دي كان عرست نحنا بنقص شعرنا ...!!
قلتا ليها يعني انتي مشكلتك الاساسية مع سنيه وفوزية مش مع الرجال ...قالت لي ايوه وحاتك ....!! قلتا ليها اهاااا انا زمني ده كلو قايل مشكلتك مع الرجال لانو في واحد سألني عنك ..قلتا ليهو لا لا امونه دي عندها موقف ..وحاظرا الرجال ...!! قالت لي امريكا رفعت الحظر لمن انا ...!! وقَعَدت تتبسم ..النبي ياعلوب بتتكلم جد ..!! قلتا ليها النشوف الاول امريكا كان جاده ..!! وبعد داك نشوف ...!! قالت لي كان كدي يانا الطولنا ...!! أبهرتني الإجابة ....!! سنه ياامونه ...عرفناك مقددا الحلة والعلاقات الداخلية ...طلعتي اصلية ومجضما السياسة الدوليه ...واللول اللول يالوليه .....!!!