يوميات علوب ...21 ...عودة علوب من رحلة سياحية
اولا شكرًا لى كل الناس السألو منى ..!! تسأل منكم العافيه ...!!! هى لكن انا ماكنت فى حته غريبه وعجيبه...!!! الجماعه أقنعونى انو نمشى الدهب ..!! وانا سامع ليك الدهب الدهب ..والناس بتمشى الدهب ..وماجايب خبر الدنيا لحدى ماجانى حُذيفة صاحبنا داك ...اصلو دايما بجيب العيد ..!! قال لى يافرده ماف غير الدهب ...!!! ومعاهو بيت شعر كمان ....قال لى (اذا غامرت فى شرف مروم فلاترضى بمادون النجوم ...) اها يااخوى نحنا ماف شرف لينا غير الدهب ده خلينا نجيب الزيت ....!! انت جاهز ..!! قلت ليهو ...حمامه ...!!! هى لكن هو ذاتو الدهب ده هو وين ...!!؟؟ ونحن ذاتو خبرتنا شنو عشان نمشى هناك ...!!؟ قال لى خبرة شنو كمان ...!! انت دايرنك محاضر فى مامون حميده .....!!! بصراحة عجبتنى الفكرة ...!!! (وافرض ماعجبتنى هو فى شنو ذاتو ....) يازول قلتا ليهو نتوكل بس ..!! قال لى حنمشى دنقلا اول ومن هناك بنشتت ...!!! ويادنقلا جاك زول ..!!! المينا البرى من الصباح ...!! قال من هناك فى جماعة بودونا محل الدهب .....وصلنا ليك ذى أربعات كده ومن هناك لورى سفنجه اصلى لقينا ليك روحنا فى نص الصحراء ....يازول جنس خلق ...وسوق ...!! وشاى وجبنه ....!!!المافى شنو ...
اها لقينا ليك جماعة كده قالو ديل الماسكين اللعب رحبو بينا وقالو لينا القصة دى هنا محتاجه صبر وحظ ...(اها انا الاتنين ماعندى ...!! ) يازول ادونا ليك مكنات كده ذي مقشاشه الكهربا ديك وقالو انتشروا ...وقلنا كده انتشرنا ...قالو لو المكنة عملت صوت معين كده طوالى تبدو حفر ...بس ونحن تلاته يوم نحرت ..بس في اليوم الرابع انا وحذيفة ده نسمع ليك تييييت تييييت أمممك الدهب جا ...والله انا لمن رجفتا ..اخيراً ياعلوب ظهر المكتوب ..!!! بس وبدينا ليك حفر ..انا على حس الدهب ده والله أرنب بس ..!! حفر جد ..!! ومافى اى حاجه ظهرت ....جونا جماعة كده قالو يساعدونا والخاين الله يخونو قلنا ليهم... ظابط ...!!! وكلنا شغالين ...قربنا نجيب بترول ..!! يازول فى النهااااية كده دقينا ليك فى صفيحة كده ...!!! الجماعة قالو بسس ..!! دى تكون مليانه دهب يكون دافنو تهراقا ...!!! اها وقلبنا بدق ...لحدى ماطلعناها ...يشهد الله مليانه حصحاص وطين وشوية رمله ...!! (هو خلقنا دى خلق دهب ..) ..!! عاينت لى حُذيفة كده قلتا ليهو الله لاغزا فيك بركه متلتلنا من الخرطوم أربعمية ميل للصفيحة دى ...!! قال لى يازول خيرا فى غيرا انت بس من اول مره كده عايز صفيحة دهب المره دى دقت فى العارضه المره الجايه جوه الشبكة ..قلتا ليهو يااخوى ولا جوه ولابره ...نحن نتخارج بس ...نحن كان وش دهب كان جانا براهو فى الخرطوم ...قال لى يازول انا ماراجع من هنا الا بى دهبى ...عايز تخلينى هنا براى ..!! ؟ وضميرك بسمح ليك ...!!؟؟ ياهو داك اللورى ارجع ..!!! اها ده نوع الكلام المابنفع معاى قصة ضميرى وضميرك والقصص دى ..!! خلاص بكون مابقدر أقرر ...!!! قلتا ليهو يازول شوف أسبوع تانى بس وعشان خاطرك ..فى حاجه بنقعد ..!! مافى انا مازولك ..!! قال لى ماقصرتا ..اها وحاتكم الحفر الحفرنا في الأسبوع ده كان رجع مشروع الجزيرة .... يشهد الله خاتم مالمينا فيهو ...اها جينا راجعين السوق بتاعهم ده نسمع ليك الجماعة قالو الحاج لما ليهو فى عرق كامل دهب ...اتذكرتا ليك الحاج ده جا معانا فى نفس (الطياره) اقصد اللورى ...حُذيفة قال لى اها شفتا الزول الملفلف كلو داك ...اها ده ياهو الحاج البقصدو الجماعة ديل ...!!! قلتا ليهو والله صحى كل شئ قسمة ونحن أظننا مقسوم لينا الشقا والعذاب ...وأول سفرية الى الخرطوم كنّا فيها انا وحذيفة ....معانا عشرين جنيه ويدينا مبقبقه من الحفر ...والدهب ده الظاهر الا نشوفو فى البترينه ...ونحن فى الطريق اقرأ ليك فى جريدة الدار (الشرطة تقبض على سارق الذهب المليارى فى اكبر سرقة دهب تحدث قريبا ....) قلتا لى حُذيفة هسه الحرامى ده كان جا هنا معانا مش كان اخير ليهو ...نحن راجعين لى اهلنا هو اهلو ديل غايتو كان شافهم بعد خمسة سنين يكون محظوظ ....اها لقيت ليك صورة الوالى ومدير الشرطة والوزير كلهم متصورين جنب الدهب المسروق ....قلتا لى حُذيفة قعدتهم هنا دى بس بتديهو خمسة سنين تانى .....!!! أحمدك ياالله غايتو سفرية احتسبناها بس ...!!! عرفتو انا كنت مختفي وين ..!!! بس بالله ماتكلمو زول ...حلات منزل صورى على صفحتى فى الفيس وعنوان كبير ....بلدنا جميلة ومليئة بالآثار ...دعوة للمشاهدة ...( الدهب عرفنا ..!! كمان مانلقى لينا لايك ...)
