يوميات علوب 24 .. العجب حبيبى ...!! .
الليله اول يوم اكتشف انو نص اولاد حلتنا ديل مرقو بره السودان ...جيت ماشى كده شاقى الحلة عاينت لقيت حتة الدافوري ديك فاااضية ....استغربتا ...!! سالتا لى شافع كده قلتا ليهو انت ناس الدافوري وين ..!! قال لى كلهم مشو السعودية ...(ياربى ده حج جماعى ولا شنو ...) ماركزتا مع الشافع ده ...لكن اتاريهو كان قاصد ...لانو فعلا فى وجوه كده كتيره لى زمن ماشايفم ...ياربى الحاصل شنو ...فعلا الود ده كلامو صاح الناس ديل اغتربو وهاجروا ...وانا كل يوم فى الفيس اشوف ليك صور لى جماعة فى المطار ...وتمشى وتجى بالسلامة...!! وربنا يوفقك ...!! ووداعا ابو الجوك ..!! وتعليقات ذي دى ...!! براى كده قعدتا اتذكر لماتنا الزمان ديك ...ودافورى العصرية المسخن ...وسيد اللبن شاقى الحلة ...وصيوانات العرس والزغاريد ماتديك الدرب ...والناس دى كلها تتقالد وتبارك ...وبنات الحلة ديل يجن مضايرات جنب الرجال القاعدين ديل ...وبالليل كل واحد فينا منتظر هناية ديك حتجى لابسه شنو وداخله كيف ..وهى ذاتا عيونا بتفتش لهناى داك ...وكلو بى أدب عالى وعادى نوصل البنات ديل بيوتن نهاية الحفلة ...ده كلام شنو ده وين الناس ديل ..!! وينو الزمن ده ...وعادى ممكن تنقشط ليك فى اى بيت تفطر ولاتتغدى ياخوانا انتو البلد خالنها لي منو ...!!؟ وعشان شنو ...!!؟
وينك يالعجب أظرف زول فى حلتنا ...ماخالى زول مابعلق عليهو ..!! بس اديهو الضحك..!! يوم واحد ماشفتو صارى وشو ..!! يشاغل الكبير والصغير..!! والناس دى كلها بتحبو وتتجاوب معاهو ...!! ياحليلك ياخ قالو فى ليبيا
...!! ياخ ليبيا دى مابتشبهك انت مالك ومال درنة ...وسرت ...وداعش ..!! وقنبلة انفجرت ..انت لو بالغتا ...بتجيب لينا العيش للفتة ....ليه ياعجبنا تفوت ..!! ماعارف انك شلتا معاك ضحكتنا ...واشتقنا ليك شديد ....!! انشاءالله تكون بتهزر ولا سافرتا ولا حاجه ..بس لابد وعاملا لينا حركة ...لكن شكلك سافرت بالجد ..لابد سنتين ..!!!؟ معقوله بس ..ليه كده تسافر ياعجب...مشتاقين يافرده ..!!
ودكتور كمال أظرف دكتور فى السودان ..!! لو فى زول ساكت جاتو حمي ينادووهو وطوالى يجى ومبسوووط ...الحاجات الكبار ديل فى الحلة كان ماشافن كمال اصلو مابقولوا بقينا كويسات ..وشفع الحلة ديل كلهم اداهم التطعيم كمال ...بشوش ولطيف وودناس ..وشاطر جنس شطارة ....!! مشيت وين يادكتور ...!!؟ انت ماعارف نص بنات حلتنا ديل مكسرات فيك ودايرنك عريس ...!! ياخ نحن الأولاد مكسرين فى أدبك وأخلاقك وظرفك ...خيلك منهن ..!! ليه مشيت ياخ ..السعودية أحسن مننا فى شنو ...قالو فى حته اسمه ..القنفذه ..هنااك فى الحدود مع اليمن ...ياخ انت كلك خضره وجمال ...مالك ومال الرمال ...!! ويارمال حلتنا زولا كان باانسك .ياحليلو ...!! حاجه ريا دى مامنتظراك تديها حبوب الضغط ...حلفت قالت بتجيبم ليها لاقرش لاتعريفه .....واى حبوب تانى بعدك مانفعتا مشيت وين خليتنا يادكتور..!! مالسه بدرى .....!!!
اوووو ابو اليا ..ياسر الطويل ..عمود الكهربا ..أطول زول فى الحلة ..وأعلى زول فى الأخلاق ...أوروبا مره واحده كده ياياسر ..أوروبا دى دايرا ليها زول بااارد ذى جوها ده ..وانت ماكده ياخ ..انت البتلقاك اول واحد فى الفرح والشين ولا واحد تانى ..انت ياياسر مش ياكا الشايل هم الحلة دى ..حصل يوم قصرتا فى حقها ...مما شفناك وعرفناك مش ياك البتودى العيان بى عربتك دى ...وانتا ذاتك البتقيف فى الاعراس دى من الصباح وتدق الصيوان وتشوف الحال تحلف تقول اخو العريس وهو ود جيرانكم ...!! لى درجة انك بتجى بداية الحفلة تبارك وتمشى تنوم من التعب ..!! ليه ياياسر ياخ ليه تمشى تخلينا .. ...صدق الحفلة من غيرك بايخة ....!! ماجاى قريب ياياسر ..وحشتنا الابتسامة ..!!
حتى انتا ياود قلبا ...شنو ياعلاء ما انت اكتر زول فينا بحب السودان ده وقلتا انا كان طلعتا منو بموت ..تمرقا فى كندا ماحرام عليك ..ياخ انتا اكتر واحد بكره البرد فينا..!! انشاءالله بس لابس كويس ..!! منو البغلغل لينا المريخاب ديل تانى ويحميهم النوم غيرك لما المعلم ده يجيب قونو ....ومنو تانى البجيب لينا الباسطة ...عمرك مابتحب تاكل حاجه براك ..الا تضوقنا ...تضوق السمح ياعلاء الله يحفظك وويحفظكم كلكم ....وين ماكنتو ويرد غربتكم دى .
ويا رمال حلتنا زولا كان باانسك يا حليلو فات رحل من بلدو رووح والله روح فاتلو لى دار ماها هيلو ...نتلاقي فى ساعة خير .. ...