يوميات علوب 5 ....علوب الاصلى...!!
للاخ والاعلامي الطيب عبدالماجد
هسه انت ياعلوب لو اديت شعرك ده شوية (جل ) ..ولبست ليك بدلة (وفيونكه ) حمرا....!!! ودورت فى الناس دى مش ممكن تكون اهم من الفنانين ديل كلهم ...!! معاك بتاع اورغن كده حررريف ...!! وساوند سيستم النوع السنيين داك فضل شنو يعنى ...
والله الفكرة عجبتنى وده ذاتو شغل حلو وخفيف وظريف...!! انووووم النهار كلو ..واضرب لى عداد بالليل يكفينى الشهر كلو ...!! ده غير السفر والمعجبين والمعجبات ...!! شايلين صورك كده ياعلوب فى المسرح يهزهزو فيها...ياسلاااام .....ياخ دى فكرة مجنونه..!!
طوالى اتصلت على صاحبى خالد قلت ليهو يحضر الأورغن انا جاى عليهو ...!! بس مشيت ليهو قال لى انت جنيت ياعلوب انا يوم واحد ماحصل سمعتك يتغنى انت قايل الغنا ده بس كده سااااكت مطلوق اى زول داير يغنى يغنى ..!!! ياخ دى موهبة واستعداد وصوت وإحساس ....!! وده كلو ماعندك ...!! خليتو كمل كلامو كلووو ...قلت ليهو هسه البغنو ديل كلهم عندهم البتقول فيهو ده ...!!!! اخد ليهو سكته كدااا ....!! قال لى لا طبعا أكيد ماكلهم..!! لكن كمان الماعندهم ديل فقاعات موهومة ساكت مصيرا تنتهى وبسرعة كمان ...!!! بسس قلت ليهو انت جبتا الرايحه..!!! اها انا داير أكون مع الفقاعات ديل ...!!! عندك مانع ..!!؟ وأزيدك من الشعر بيت ...!! وداير انتهى سريييع كمان ...زمن ذاتو ماعندى ..!!؟ اها رايك شنو ...!!
اخد ليهو ضحكة كده وقال لى تنتهى شنو ياعلوب..!! هو انت بديت عشان تنتهى ...!!! والله دى قصة عجيبة ...!! قلت ليهو انت مالك بس انا بتحمل كل النتائج ...قال لى لكن انا مابتحمل... انت عارف انا عازف عندى وضعى ومابعزف مع اى زول ..مع الاعتذار ياعلوب ..!! ياخ انا مابقدر اعمل حاجه ذي دى...!!! وقت شافنى اتأثرت كده وحسا انو صدمنى....!! قال لي خلاص خلاص ياخ انا بديك زول زيك كده من أصحابنا ديل برضو عامل فيها بعزف اورغن لكن عزفو زي غناك ده ...!!! قلت ليهو بسس ده زولى ...!! ديل المبدعين المالاقين فرصة ...!! فعلا يازول اتصل بيهو...!!! داك كمان ماصدق عشره دقايق كان شايل الأورغن فى الرقشه ووصلنا ...!! بس قلت لى صاحبى ده انت كتر خيرك ..!! ماقصرت خلينا انا وزولى ده بنتصرف ...!! سألت بتاع الأورغن الجا ده ..!! قلت لى معليش اسم الكريم قال لى ..عصام راستا ....!! ياسلام حتى اسمك فنى ..!! وشكرا ليك ياابو الخلد ماقصرت ويابخت من وفق راسين فى الفن والابداع ...!! ومضى خالد وتركنى وراستا ...ليعلن التاريخ عن ميلاد الثنائى الذي سيهز العاصمة ...!! وفعلا بديت مع أستاذ راستا ده وحفظت ليك كل اغانى الهجيج الفى البلد ...
ويازول هو ذاتو ماهين اصلو ماعلق على صوتى ده ...!! بس مشغول بالجلكسات البعملا فى الأورغن ده ..والله الود
لعاب عديل كده ..!! وقت يعمل ليك موسيقى القرد دى بالاورغن والله انا لمن انطط ...ككك كك ..تتك تك ..ربب رب ...!! شغل نضيف ياخ ....!! وانا ماسكا ليك من الكبرى وصلتها الحلة الجديده ...!! غنا ذاتو ساهل وممتع ...بس تكون حافظ المحطات كويس !! لما حسّيت أنى كمساري ...!!! صحافاات...اى اى ...بحرى بحرى ....ترا رم ....المزااااد .
اها اها ..!! عماراااات ... ونمشى الصافية ..كده كده ...!! يازول وقت وصلت الكلاكلات دى ..صوتى ذاتو لمن فتح ....!! والله راستا ذاتو قال لى ياخ انت ذاتك عندك حضور خطر وحركات كده ...!! يازول البروفات دى مدوره يوميا ...جيهنا الشغل صاح ..!! وبس جاتنا الفرصة الاولى ...(سماية بت جيرانا) ...قلت ياعلوب مافيها حاجه مالو جامل فى البداية خلى الشباب يتعرف عليك ...!! بس يازول ضربنا ليك حفله ذى الصاقعة ... الحلة دى كلها تتكلم ...!! مع الساوند العجيب ..!! وراستا ده عمل عمايل أتقطع عديييل كده ..والله انا ذاتى مرات صوتى ماسامعو ...!! بس شابكم ليك ..وب ..كب ..رب ..هب.. اررح ..اها فوق ....بديت ليك بى العربية ..ماخليت لى ماركة حايمه ..!! والناس
دى هايجه ..!! ودخلت ليك الماركات الجديده دى ..!! قادننا ياخ بى الكامرى ..والمارسيدس ..دخلت ليك (الفيرارى) (والدودج )...والله الجكس ده لمن فهم حاجة ...!! واخش ليك فى اى حاجه كده سريعة ..!! وأختم ليك بى بنمسكا من الكبرى ...اها دى الإضافة الدخلتها فيها أنى مرقت من الخرطوم ومشيت بيها الولايات ...كسلا كسلا ...!! بورسودااان ...والله لما أقول ليك ...الدوييييم دى كده ...!! اليدين دى تصل السما ...!! اتارى الولايات كلها فى الخرطوم ..!!! وفعلا والله من كد وجد ..غايتو دى آمنت بيها فى تجربتى دى ..!! والله ياخوانا لما بقيت برفض بعض الحفلات .... ( علوب عبر ) ..اها بس كمان طريق النجومية والشهرة ده متعب شوية ...يعنى تلفونك ده طوااالى شغال.....انا وراستا لغينا قصة الرحلات دى ....!! متعبه ياخ ....!! وراستا قال لي ياعلوب انت لازم تشوف ليك لقب كده تنافس بيهو ...!! ) الفكره ريحتنى شديد ..!! بدينا نفتش ..!!!؟ لقينا المناصب الدستورية العليا دى كلها محجوزة ... الإمبراطور قاعد ...والملك موجود... والسلطان ده كمان مزاحمنا شديد ...والقيصر ياهو ده ..(هو ذاتو مابظهر كتير كان أدانا اللقب ده والله نشترى منو ...!! قلت ليهو بسس لقيتا ياعلوب ..انا الرئيس ..!! والله راستا ده فضل ليهو يتلب بالحيطه قال لى انت يازول داير تجيب لينا الهوا ولا شنو ...!! فعلا لقيت فكرتى حامضه ...!! اها فتشنا تانى....قلتا نشوف المهن ....!! لقيناها مستفه ...!!! داااك الدكتور ...!! ونزار المهندس ...هى ياخوانا الناس ديل خلو لينا شنو ...!! بسس قلت ليهو ياراستا انا ..المعلم ...!! منها ندى المهنة دى مكانتا ...وبى تحت تحت نكون قاصدين المعلم ..المعلم ..!! .قال لى كده انت فعلا .. معلم ...!!! تمام يااصلى ....!! بس قال كلمة اصلى دى هبشتنى ليك من جوه قلت ليهو بسس خلينا من المعلم ...!! من الليله انا علوب الأصلى ...والله راستا ده لمن صفق ....!!!
اها ياخوانا عندكم اى مناسبة لاتترددو ..عصام راستا وعلوب الاصلى ...والعداد قابل للتفاوض ..رقم الموبايل للحجوزات ٠٩١٢٣٠٠٠٠٠او سودانى ٠١٢٣١٥١٥١٥ أرقام ذاتا بتاعة معلمين..!!!
......مدير الاعمال ...عادل زلطة ...انا ذاتى مرات برد ..!! .بالله بس جلونا من الرحلات ....اصصصلى ياعلوب ....!!!