الحلقة التاسعه والستون من يوميات علوب

0
يوميات علوب 69 ....!! الله كريم

الحق ياعلوب التلاجه باظت ...!!! لاحول الله ..!! بالله ده وقتو ...قلتا لي مشاعر مالا ...!!!؟ قالت لي والله ماعارفا براها كده (رترتت ) ووقفت ...!!! اها انا الحاجات البتقع رب ومامحسوب حسابا بتجهجهني ..!! الله يسهل بس ماتكون دايرا مكنة او احتمال تلاجه تانيه ...!!!اها قعدتا أفكر ..!!! اتذكرتا مصباح ودجيرانا عندو فكره عن الحاجات دي ...ضربتا ليهو ...جا عاين ليها بي هنا وبي هنا وقعد يهبش في مكنتا ذي (البتيخه ) قال بتكون ضربت شنو كده ماعرفتو ...!! قلتا ليهو اها يعني شنو والحل شنو ...قال لي والله ماعارف ....طوالي طردتو ..يضحك كمان ...!! قلتا لازم أخصائي تلاجات المهم مشيت سألتا لقيت واحد جبتو ...!! الغريبه نفس طريقة مصباح ...هبشا كده كأنها محمومه ...بس ده الإضافة العملا انو شغلا ووقفا تاني وطبيعي ماتشتغل ..!!! طوالي قال لي المكنة دي حرقت ....!! يازول حرقت عديل ...!!؟ اها والعمل ...!! قال مكنة جديده ....!! الله لاكسبك ياخ كدي شوفا تاني ...!! لاحظتا انو دخل في شخصية دكتور كده ...قال لي والله ياود العم ...ماف طريقة عملنا العلينا ...!! ( التقول عمل عملية مرارة ...الله يفقع مرارتك ياخ ) ...!! قلتا لي هسه انتا عرفتها كيف حرقت ..!؟ امكن ضربت فيوز ...!!؟ لانو انا هسه شايفك بس شغال بي يدينك ديل ...!! وتهبش ...!! والله داير يدقني ...قال لي كمان بتغالتونا في شغلنا ....!! قلتا ليها خلاص شكرًا ....!!! اخد ليهو خمسين جنيه رسوم فحص وتشخيص وأتوكل ....!! انا شخصيا مامقتنع بالقصة دي ...بس اتذكرتا جمال صاحبنا مهندس في (كولدير) قلتا بسسس ...جيمي ده بديني الأكيدة ..فعلا جا برضو 
يشوف التلاجه ...( شوف التلاجه اللقتا لحدي هسه تلاته خبرا 
) اها جمال معلم ..!!! جا بي عدتو ...وبعد الفحص والتحليل 
قال المكنة كويسه المشكله في حاجه كده ماعرفتها برضو..!!! قال دي بتكون حرقت ... انا لما ابتسمتا ...حمد لله علي سلامة المكنة ...المهم كتب لي الحاجه دي في ورقة ووصف لي اجيبا من وين ..طوالي مشيت فعلا لقيتا ..!!! لكن للأسف 
اقل من سعر المكنة بي شويه كده ...!!! وانا الشهر ده حق مكنة حلاقة ماعندي ...!! اها فكرتا في زولي الأخصائي الشال الخمسين قلتا الزول ده يجازف لي مكنة قديمه ولا حاجه ...دكانو ده ملان تلاجات ...!!!جيتو ..!!! قطع لي سعر من راسو الكبير ده ..!! أحسن اشتري جديده حتي لو أغلي ...المهم جيت البيت زهجان قلتا نشوف بكرا نعمل شنو ...!! الله كريم ..!!! 
جيت داخل البيت فطوم جاتني جاريه الحق ياعلوب التلاجه اشتغلت ..!! والله جريت جريه عليها فعلا لقيتا ليك مدووره والنور شغااال ...!!! قلتا ليهم في زول عمل ليها حاجه 
قالو والله ولا حاجه مشاعر بس كانت عايزا ليها حاجه كده اتذكرت انو التلاجه ماشغاله (لبعتا ) كده بي زهج اشتغلت ..!!
انا غايتو لي هسه ماعرفت التلاجه دي بالظبط الحصل ليها شنو..!!؟؟ لكن ماانا علي يقين منه ان التلاجه لم يسعفها ( كف ) مشاعر لكن عالجتها ( يد الله ) عالم الاحوال ومدبر الحال ..!! الظاهر الله كريم دي انا قلتها من جووه ...بركاتك ياعلوب ...في زول عندو تلاجه بايظه ..!! الله كريم علينا وعليكم

التعليقات

احصاءات المدونة