يوميات علوب ..85 ....!! بيت مال (ورياض )
انا غايتو مما فوزيه وسنيه ديل ألقاهن (مخيتات ) الحله دي داخلات ومارقات ...!! طوالي بعرف ان هناك حدثا جلل يحيط بالمنطقه ...!! بذكروني لما يقولو ليك في الأخبار شوهدت البوارج الامريكيه تحوم في المتوسط ...!!! اها من امبارح لحدي الليله صادفتهم تلاته مرات ....والرابعة في بيتنا ...(جون كيري مابحوم الحوامه دي ) قلتا لي مشاعر خير ان شاءالله (النساوين )ديل مالن ....!!؟ مشاعر طبعا ماتتلفت بتجيب الخبر ذي ماهو ...قالت لي كمال داير يعرس تاني ...!! ( كمال ده بتتذكروه ...) بتاع البنك ياخ ...!!! الكان مشخت للحلة دي كلها ....!! وقبضوهو بالثابته داير يعرس في مرتو وأحبطت المحاولة الانقلابية في مهدها ...!! وبعد داك بقي يسلم حتي علي شفع الحله ...!!! قلتا ليها انت متاكدا من الكلام ده ....!!؟ وعايز اسألك ..!! انتي ناس فوزيه ديل عندهن( قمر اصطناعي ) ولا بجيبو الاخبار دي كيف ...!!! بعدين الراجل ده ما اظن يكرر القصة دي تاني .....!! مشاعر قالت لي لااااا...لا ...بكررررا ...اصلو الرجال ديل كلهم كده..!! اول ماتجيهم فكرة العرسة التانيه دي لازم ينفذوها ...!!! قالت لي المشكله ماهنا ...!!! انت عارف العروس منو ...!!!؟ قلتا ليها منو..!!؟؟ قالت لي أميرة قلتا ليها بس أوعي تكون اميرة (فلقصة ....) قالت بس ياها ذاتا .....!!! اممممك خلاص كلمت.... و دقت طبول الحرب ...( دي اميره السكاها الكلب ) ....!!
قالت لي اتاريها طلعت ( شلابه ) ...!! قلتا ليها (شلابه) يعني شنو ..!!؟ قالت لي يعني بتختف راجل المرا ...قلتا ليها اول حاجه اللفظ ده ماعجبني ...!! وتاني ماتكرري ..الحاجه التانيه شنو تختف وتنهب ...عروس هي ولا (حديه) ...قالت أكون معاك واضحه ياعلوب ...هناك أزمة زواج مستفحلة تستدعي احيانا استخدام القوة .....!!! قلتا لي مشاعر انت الظاهر النت ده انتهي منك ...!! لكن اصبري لي بقطعو ليك ...!! قالت لي خليك ديمقراطي ياعلوب واقبل الرأي الاخر ...!!!
هياااا مشاعر البقت مناضله ...!!! المهم نرجع لي موضوعنا قلتا ليها وهسه العرس متين ..!!؟ قالت لي هناك تكتم شديد علي الموضوع ( ماشاءالله تكتم شديد..!!! بس فوزيه وسنيه ) ...مشاعر قالت انو اميره (شلبتو) يوم عرس إيمان ...!!! ( تاني شلبتو ) ...وان السيد كمال كلم ابوها ...وأبوها كلما ...وقالت موافقه ....قلتا ليها اها وناس فوزيه دايرات شنو هسه ...!!!
قالت لي دايرين يفرتقو العرسه دي ...!! فوزيه عندها تار قديم مع كمال ...وسنيه متشاكله مع أهل ( فلقصه ) ..،طيب قلتا ليها كده ماخلاص اكتملت العمليه عرسا وطارت ...قالت لي لا العملية معقده شويه ...كانو معتمدين علي (مرت ) كمال تهرشو ...قامو وصلو ليها الخبر ....!!!
قالت خلي اليعرس كان معرس ...سجل لي بيت الرياض ...!! ( ابو الزفت )....ناس سنيه دايرين يموتو اخير ليهم العرسه من بيت الرياض ده ....!! قلتا ليها خلاص ماكده الموضوع انتهي قالت لي ...لا ما انتهي ...سنيه قالت لازم كمال يعرف ( فلقصة ) دي علي حقيقتا ....
انو الشعر ده ماشعرا ولا الرموش ..!! ولونا ماكان كده...!! ومركبا عدسات ( شوف النسوان الحاقدات ديل ) ...قلتا ليها ودي يوصلوها كيف ....قالو عندهن صور اسمها قبل وبعد ....حيوصلوهم لي كمال ....!!!
لكن يبدو ان القدر لم يمهلهن طويلا ...عقد كمال علي فلقصة أعلن رسميا يوم الجمعة ...!! وسنيه وفوزيه ياهن ديك مغتغتات بالبطانية ...!!
مبروك يافلقوص
بي (شلابه ) دي ...!! حقو يسمكوك شلبوص ...!! بيت مال و ( رياض ) ....هي لكن كمال ذاتو بالغ